Договорена е засилена соработка помеѓу Јавното обвинителство и Државниот завод за ревизија, соопшти Обвинителството. Главниот државен ревизор Максим Ацевски и неговиот заменик Орхан Адеми денеска се сретнаа со Јавниот обвинител на РС Македонија Љубомир Јовески и раководителот на одделението за соработка со други институции, обвинителот Башким Бесими, во просториите на ДЗР. Работната средба ја иницираше Главниот државен ревизор, а во врска со најавите на Јавното обвинителство за активирање на национален фронт за борба против корупција, а со цел да се интензивира и да се зајакне соработката помеѓу надлежните институции во превенцијата и борбата против корупцијата. Обвинителот Јовески појаснил дека идејата на Обвинителството не е да се создаваат паралелни институции, туку да се подобри меѓуинституционалната координација и размена на информации во функција на борбата против корупцијата.

– Исклучително ја цениме самостојноста на Државниот завод за ревизија, а ревизорските извештаи претставуваат солидна и корисна основа за нашите постапки – рече Јовески.

Тој најави дека Јавното обвинителство ќе изготви задолжително упатство со насоки до јавните обвинители за начинот за постапување по ревизорските извештаи. Исто така, како што соопштува ЈО, Ковески го поттикнал ДЗР што почесто да ја користи можноста предвидена во членот 35 од Законот за државна ревизија, согласно кој „доколку овластениот државен ревизор при ревизија оцени дека субјектот на ревизија сторил прекршок или кривично дело должен е веднаш да ги извести надлежните органи“, односно уште пред изготвувањето на конечниот извештај. Според ЈО, ова значително ќе го забрза постапувањето на Јавното обвинителство по наодите од извршените ревизии и ќе овоможи навремено прибирање на доказите за кривична постапка.

На оперативно ниво, биле разгледани и други аспекти за олеснета примена на ревизорските извештаи во кривичната постапка.

Главниот државен ревизор потенцирал дека Државниот завод за ревизија како врховна ревизорска институција во државата во континуитет стои на располагање со својата експертиза, стручност и професионалност на сите надлежни институции во системот за превенција и борба против корупцијата.

Двете институции се договорија во следниот период да изготват заеднички план со конретни активности кои треба да се реализираат до крајот на годината, а кои вклучуваат и следење и повратни информации за постапувањето по ревизорските извештаи, како и едукација на јавните обвинители за методологијата и пристапот на работа во изготвувањето и содржината на конечните ревизорски извештаи.

Главниот државен ревизор и Јавниот обвинител се согласиле дека во изминатиот период, по потпишувањето на заедничкиот меморандум за соработка, комуникацијата помеѓу ДЗР и ЈО е значително унапредена и подобрена, но постои можност и за дополнително зајакнување. Веќе преземените активности вклучуваат номинирање лица за комуникација од двете институции, како и одржување почести работни средби меѓу овластените државни ревизори и обвинителите кои постапуваат во предмети кои произлегуваат од констатираните состојби и утврдени неправилности во конечните ревизорски извештаи.