Комисијата за политички систем и односи меѓу заедниците усвои десет заклучоци од Јавната расправа за потребата од измени на законската регулатива со цел зајакнување на безбедноста во сообраќајот, одржана на 7 февруари годинава во Собранието.

Едногласно со 14 гласа „за“ собраниската Комисија, денеска ги усвои заклучоците со кои се укажува на потребата од:

Намалување на бројот на сообраќајни прекршоци и кривични дела против безбедноста на јавниот сообраќај преку подигнување на одговорноста и свеста на сите учесници во сообраќајот и преку елиминирање на неказнивоста на сторителите;

Заострување на казнената политика преку изменување и дополнување на Кривичниот законик, Законот за прекршоците, Законот за безбедност во сообраќајот Законот за јавните патишта, Законот за извршување на санкциите и нивно меѓусебно усогласува најдоцна до крајот на 2025 година;

МВР да ги забрза активностите околу целосно и ефикасно имплементирање на системот „Безбеден град“, кој ќе овозможи автоматско констатирање на сообраќајните прекршоци најдоцна до крајот на годинава;

Меѓуресорски стратешки акциски план за забрзување на активностите за вмрежување меѓу МВР со судовите и обвинителствата со што ќе се овозможи побрза комуникација и намалување на можностите од злоупотреба на системот;

Судовите својата работа да ја темелат на почитување на законските начела со посебен акцент на непристрасноста, да ги применуваат законските одредби во целост и изречените казни да се во согласност со тежината на прекршокот и да се имаат предвид мерките кои може да се применат да ја спречат можноста од повторување на прекршоците или кривичните дела во сообраќајот;

Надлежните институции да обезбедат поголема контрола на Автошколите и постојана едукација на инструкторите;

Надлежните институции да обезбедат поголема контрола во Центрите за техничка контрола на исправноста на возилата во сообраќајот;

Превентивни мерки со предлог Акциски план за нивно реализирање и се препорачува РСБСП да ги засили своите активности во насока на подигање на јавната свест, притоа истакнувајќи ја личната одговорност на секој поединец кој на кој било начин учествува во сообраќајот;

Поттикнување од едукативно-превентивни мерки во градинките и училиштата во однос на сообраќајната култура и спречување на насилството;

Медиумите да ја имаат предвид важноста на едукативните програми и содржини како превентивни мерки за спречување насилно однесување во сообраќајот и во сите области од секојдневното живеење;

Заклучоците ќе бидат доставени до Владата, РСБСП, АВМУ и сите поканети учесници на оваа јавна расправа, а ќе бидат објавени и на веб-страницата на Собранието.

Претседателот на Комисијата, Љупчо Пренџов, на почетокот изрази благодарноста до сите учесници во работата и до пратениците.

-Над 95 проценти од пратениците ја разбраа важноста на оваа јавна расправа и потребата од делување во општеството, секој согласно своите надлежности и сите 95 проценти од вкупниот број на пратеници и пратенички групи одлучија дека за вакви работи никој никогаш не смее да политизира и се надевам дека и во следниот период Собранието ќе испраќа сè почесто вакви пораки – нагласи Пренџов.

Пратеничката од НСДП, Соња Мираковска нагласи дека сите треба да сме свесни дека превенцијата е многу поважна од зголемување на казнената политика.

-Ако не добиеме сите лекција како општество и не се потрудиме од најмали нозе децата да разберат што значи да се учествува во сообраќајот, што значи дека еден човек кога ќе влезе во возило е потенцијален убиец, што значи ако не се почитуваат правилата, што значи ако судовите не судат како што треба, што значи ако родителите бараат врски ако децата напра ват нешто … ако таа лекција не ја имаме сите … Можеби требаше да ги ставиме понапред во заклучоците, а не на крај, бидејќи според мене се многу поважни – изјави Мираковска.

Во расправата учествуваа претставници од Министерството за внатрешни работи, Министерството за правда, Републичкиот совет за безбедност на сообраќајот на патиштата, судии, јавни обвинители, невладини организации, медиуми и останати општествени чинители. Не се вклучија пратеници, а нејзино продолжение на кое ќе бидат посочени заклучоци ќе биде дополнително закажано.

Иницијативата за јавната расправа следува по случајот на Фросина Кулакова, 22-годишна девојка од Неготино која на 29 јануари беше прегазена на пешачки премин на бул. „Партизански Одреди“ од страна на 20-годишниот Васил Јованов од Скопје. На 20-годишниот скопјанец осомничен за смртта на Фросина му беше определена мерка притвор од 30 дена, а за него и претходно имало кривични пријави за друга сообраќајна незгода и за недозволена употреба на дрога.