Во Франција од денеска секојдневните активности, како што се пиење кафе во кафичите или возење со воз, ќе им бидат дозволени само на оние кои имаат потврда дека се вакцинирани, имаат прележано Ковид-19 или имаат негативен тест, пренесува Франс 24.

Строгите правила, вклучувајќи го и задолжителното вакцинирање за сите здравствени работници до 15-ти септември, ќе бидат на сила до средината на ноември и ќе важат за сите полнолетни лица.

Дозволите ќе мораат да ги имаат и младите од 12 до 17 години, а тие ќе ги добијат од 30-ти септември.

Рестораните, меѓуградските автобуси, авионите, здравствените објекти и саемите се само неколку од местата на кои ќе мора да се покажуваат овие дигитални дозволи.

Ваквите дозволи од средината на јули веќе почнаа да се применуваат во кината, музеите и на големите собири.

Во Франција викендов имаше големи протсети, каде повеќе од 200 илјади луѓе излегоа на улиците, незадоволни од новите мерки кои ги донесе владата.