Легендарниот Курт Кобејн, кој е починат на денешен ден – 5 април 1994 година, беше една од најголемите музички ѕвезди на 20. век. Неговата кратка, но интензивна кариера го претвори во симбол на гранџ-движењето и алтернативната култура. Иако издаде само три студиски албуми со групата „Нирвана“, неговото влијание врз музичката сцена останува огромно и денес, пишува „Стил“.

Роден во Абердин, Вашингтон, Кобејн имал тешко детство. Разводот на неговите родители, кога имал само девет години, оставил длабоки емоционални траги врз него. Изолиран и несфатен, тој често го менувал домот, живеејќи наизменично со татко си, мајка си и разни роднини. Како тинејџер, станувал сè побунтовен, а неговите проблеми со менталното здравје почнале да се продлабочуваат.

Со создавањето на „Нирвана“ во доцните 80-ти, Кобејн конечно нашол начин да ја изрази својата емоционална турбуленција преку музика. Албумот „Nevermind“ (1991) го катапултираше бендот на врвот на светската сцена, а песната „Smells Like Teen Spirit“ стана химна на генерацијата. Сепак, со славата дојде и товарот – Кобејн се бореше со депресија, зависност од хероин и тешкотијата да се носи со јавниот притисок.

Во 1992 година, Кобејн се ожени со пејачката Кортни Лав, а истата година ја добија ќерката Френсис Бин. Нивната врска беше бурна, исполнета со љубов, но и со нестабилност. Иако неколкупати се обидуваше да се ослободи од зависноста, неговите демони го прогонуваа. Предозирањата и обидите за рехабилитација станаа сè почести, а мрачните мисли не му даваа мир.

Во март 1994 година, по сериозен обид за самоубиство во Рим, Кобејн беше хоспитализиран, но наскоро ја напушти болницата. Набргу потоа, исчезна од јавноста. На 8 април, неговото тело беше пронајдено во неговиот дом во Сиетл, а аутопсијата покажа дека починал три дена претходно, на 5 април. Причината за смртта беше прострелна рана во главата, а токсиколошкиот извештај покажа високи нивоа на хероин и седативи во неговиот организам.

И покрај трагичниот крај, Кобејн останува една од највлијателните фигури во историјата на рок музиката. Неговата искрена, сурова уметност продолжува да инспирира нови генерации, а неговата музика сведочи за бурниот живот што го живееше.