Франческо Ривела, кој многумина го нарекуваа „татко на Нутела“, почина на 97-годишна возраст. Овој хемичар работеше за „Фереро“ и беше дел од тимот што го создаде овој сладок намаз.

Започнал да работи за „Фереро“ во 1952 година, по дипломирањето на Универзитетот во Торино. Тој беше во тимот задолжен за проучување на суровини за развој на нови производи.

Тие комбинираа, рафинираа и тестираа состојки во потрага по совршени вкусови. За време на неговата долга кариера, Ривела стана висок менаџер во споменатата компанија, работејќи како десна рака на Микеле Фереро.

Новинарот Џиџи Падовани во својата книга „Мондо Нутела“ (Mondo Nutella) напишал дека тие двајца го обиколиле светот во потрага по слатки, не за да го копираат нивниот вкус, туку за да ги подобрат.

По пензионирањето, Ривела живеел во Алба, каде што се посветил на овоштарството.