Американскиот научник Џон Банистер Гудинаф, најстариот нобеловец и пронаоѓач на литиум-јонски батерии, почина на 101-годишна возраст.

Тој почина во неделата, според Универзитетот во Тексас, каде што работел како професор по инженерство.

„Наследството на Џон како брилијантен научник е неизмерно“, рече Џеј Харцел, декан на Универзитетот.

Смртта на познатиот нобеловец ја потврди неговиот ученик Николас Грундиш, пренесува индискиот „Бизнис лајн“ (Business Line). Британско-американскиот научник Стен Витингем, кој ја доби Нобеловата награда заедно со Гудинаф, беше првиот што откри дека титаниум сулфидот може да послужи како катоден материјал за складирање на литиум, а Гудинаф го усоврши ова откритие со катода базирана на кобалт.

Денес, литиум-јонските батерии првенствено се користат за мобилни телефони и електрични возила, а современиот живот е тешко да се замисли без нив.

Гуденаф ја доби Нобеловата награда за хемија во 2019 година, кога имаше 97 години.

Роден е во Германија во 1922 година во американско семејство. Тој служел како метеоролог во Армијата на САД. Дипломирал на универзитетот со диплома по математика и докторирал по физика на Универзитетот во Чикаго.

Гудинаф беше професор на Универзитетот во Тексас во Остин, а во 2008 година ја објави својата автобиографија „Witness of Mercy“, која се занимава и со наука и со духовни теми.

Неговиот ученик Притам Синг го опишал починатиот научник како „прекрасна душа, голем хуманист, човек чија врата била секогаш отворена за секого за дискусија, совет и помош“.