Тренерот на МЗТ Скопје Аеродром, Васко Атанасов, се соочува со сериозен проблем во пресрет на финишот од сезоната.

Деталните лекарски прегледи покажаа дека повредата на Бојан Крстевски е од посериозен карактер и дека ќе мора да паузира во следните три до четири недели.

Искусниот центар го повреди прстот на десната рака на мечот против ТФТ на неодамнешниот турнир од АБА2-лигата во Широки Брег, по што мораше да му биде имобилизиран.

Крстевски поради тоа ги пропушти преостанатите две средби во Босна и Херцеговина, а потоа и дуелите против Вардар и Академија ФМП од домашното кошаркарско првенство. Воедно нема да биде во тимот и на претстојните четврт-финални серии во двете натпреварувања.

МЗТ следниот меч ќе го одигра в петок на домашен терен против Гостивар (19 часот), додека плејофот во регионалното натпреварување ќе го почне следната среда (10 април) против Широки, исто така во салата „Јане Сандански“.