МЗТ Скопје Аеродром и по трет пат беше подобар противник од ТФТ Моцарт за сигурни 72:58 и конечни 3-0 во полуфиналната плеј-оф серија од Првата македонска кошаркарска лига.

Бранителот на титулата во раната фаза дојдоа до двоцифрена позитива (26:16). Нешто подоцна позитивата играчите на тренерот Васко Атанасов и на „плус 11“ (30:19), но нивниот ривал успеа да намали половина од негативата. ТФТ се доближи на „минус пет“ (25:30), нешто потоа и на уште пониски (27:31).

Но, гостите од Аеродром веднаш одговорија со своја мини-серија преку Д. Стојановски и Гилон за враќање на двоцифрено водство (37:27), кое во понатамошниот дел стана и повисоко (42:29). На паузата во СРЦ „Кале“ првакот имаше предност од 44:32.

А по одморот, МЗТ го зададе и решавачкиот удар, во третите 10 минути, „сино-белите“ одиграа уште подобро во одбраната. Постигнаа 16, а на противникот му дозволија да реализира само седум, за недостижно водство од 60:39 по три одиграни четвртини.

Беа решени сите дилеми околу победникот, тренерот на МЗТ Атанасов одлучи да им даде повеќе минутажа на помладите, а логично стартерите ги остави на клупата.

Кај МЗТ Баковиќ застана на 14 поени, а Делалиќ, браќата Војдан и Дамјан Стојановски имаа по 10. За ТФТ „дабл-дабл“ учинок од 14 поени и 17 скокови имаше Хаутон, а 10 поени забележа Луис.

Противник на „металците“ во големото финале ќе биде победникот од втората полуфинална пресметка каде моментно кошаркарите на Пелистер водат со 2-1 против екипата на Работнички.

Непосредно пред стартот на мечот кошаркарите на МЗТ носеа маици со ликот на Марјан Михајловски, човекот кој беше дел од клубот и кој цел живот живееше со и за КК МЗТ Скопје Аеродром.

Тоа беше дополнителен мотив за играчите на МЗТ да победат за него, но и за сите кои го сакаа и ценеа и кои знаеја колку ја сакаше плаво-белата боја да дојдат во СРЦ „Кале“ и да му го упатот последниот аплауз кон небото. Секако и да помогнат да се оствари тоа што тој најмногу го сакаше, а тоа се победите на својот миленик. За Мац!