Министерството за здравство не дава конкретен одговор на прашањето на „Слободен печат“ дали некоја фирма се јавила на објавениот по вторпат тендер за обнова и набавка на нова компресорска станица за потребите на хируршките клиники. Откако првиот тендер распишан од Заедничките служби на Клинички центар пропадна поради тоа што ниедна фирма не се јави на огласот и покрај тоа што три фирми биле да извршат увид на местото, неизвесно е каква е ситуацијата со вториот тендер што го распиша Министерството за здравство. Станува збор за ист тендер за набавка на компресорска станица како и првиот, со исти технички спецификации и со иста проценета вредност на набавката, ама не е јасно дали досега која било фирма се пријавила да го изведе комплицираниот зафат.

Согласно објавениот оглас на Електронскиот систем за јавни набавки, во моментов течат роковите за поднесување понуди од заинтересираните економски оператори. Крајниот рок за поднесување на понудите истекува на 12 септември 2024 година, по што договорниот орган ќе изврши јавно отворање, велат од Министерството за „Слободен печат“ на нашето прашање дали некоја фирма досега се јавила на тендерот.

Од оваа компресорска станица зависат сите хируршки сали во хируршките клиники, а во меѓувреме ситуацијата со операциите се санира на начин што се донесени надворешни компресори. Уште од мај годинава нема трајно решение за овој горлив проблем, а завршуваат и летните одмори кога вообичаено има помалку операции. Со доаѓањето на есента доаѓаат и повеќе операции. Проблемот почна со наводна непријатна миризба која се ширела во хируршките сали и со проблеми во компримираниот воздух, па во мај се одложуваа сите интервенции, освен најитните. Градската болница и ГОБ „8 Септември“ го презедоа товарот од напливот на пациенти додека хируршките клиники се екипираат со надворешни компресори.

Во меѓувреме беа нарачани повеќе мерења на примероци од компресорскиот воздух од кои едно мерење покажа зголемено ниво на маслени пареи и на влага во компримираниот воздух кој за пациентите е лек. Земените мостри не кореспондирале на европските стандарди и не е познато колку време тоа било така.

Според документите што ги објави „Слободен печат“ на 3 јуни годинава, стручен тим од претставништвото на германската фирма „Дрегер“, зел примероци од компримираниот воздух од станицата на Клинички центар.

Станицата за компримиран воздух е пуштена во употреба во 1992 година и во тоа време била во согласност со регионалните регулативи. Станицата е одржувана во согласност со препораките на производителот. Но, во меѓувреме стандардите за квалитет на компримираниот воздух се промениле, па така и компресорската станица на Клиничкиот центар станала неусогласена со нив.

„Во меѓувреме стандардот за квалитет на медицинскиот воздух е променет. Според последните прописи, тој се третира како лек и неговиот состав го пропишува Европската фармакопеја – монограф 1238. Со самото тоа постоечкиот систем не може да ги исполни строгите прописи кои се донесени отпосле. Мерењето кое е извршено на 3 јуни 2024 година покажува ниво на влага во медицинскиот воздух од 245 ппм, додека нивото на маслена пареа е измерено и изнесува 0,6 милиграми на метар кубен и на мерното место во станиците и во оперативниот блок. Нивото на влага кое го пропишува европската фармакопеја е 67 ппм додека за маслена пареа 0,1 милиграми на метар кубен. Начинот на кој медицинскиот воздух треба да се доведе на ниво пропишано со стандардот е замена на целата станица. Овие измерени вредности се во границите на очекуваните резултати за овој вид и старост на опремата“, пишува во стручниот наод на компанијата „Дрегер“.

Новиот тендер кој го распиша Министерството за здравство има проценета вредност од 18.644.068 денари без ДДВ.

Министерот за здравство, доктор Арбен Таравари, претходно најавуваше дека рокот во кој ќе бидат завршени сите работи со целосно менување на компресорската станица е декември, но сè поизвесно е дека нема да се стигне во таков краток рок да се извршат сите работи. Не е познато кога пациентите ќе ги добијат здравствените услуги со нова компресорска станица.