Заедничкото свирење и слушање музика во живо значително го зголемува нивото на „хормонот на љубовта“ окситоцин – покажало едно истрување, објави ДПА.

Истражувачите го презентирале научниот експеримент на овогодинешниот музички фестивал во Дрезден.

„Музиката е дури и подобра од бакнежите или сексот“, рекол интендантот Јан Фоглер.

Нивото на хормони регистрирано кај посетителите и музичарите било делумно повисоко од она што е измерено во претходните студии по страсен бакнеж или дури и по секс.

Окситоцинот обично се ослободува преку прегратки и бакнежи и има способност да го зајакне имунолошкиот систем, како и да ги намали стресот, вознемиреноста и болката.

На концертот во Центарот за регенеративна терапија во Дрезден, според соопштението, кај волонтерите во публиката по концертот било измерено во просек 5,4 пати повисоко ниво на окситоцин отколку претходно.

Слично зголемување имало и кај музичарите.

„Додека прегратката меѓу нив речиси не донела никаква промена, заедничкото свирење довело до јасно зголемување“, рекол водачот на експериментот, професорот Клеменс Киршбаум од Техничкиот универзитет во Дрезден.

„Ова значи дека „заедничкото свирење може биолошки подлабоко да поврзе отколку прегратката“, рекол Киршбаум.

Многу слушатели, исто така, изјавиле дека почувствувале силно чувство на поврзаност со музичарите, како и со другите посетители на концертот. Тоа биле особено оние кои ја доживеале музиката како експресивна, емоционална или естетска.

За истражувачите е јасно – „музиката создава поврзаност – мерлива во телото, почувствувана во срцето“.