Во рамките на анплаг-сериите (Unplugged series) во Културно-информативниот центар во Скопје на 29 јуни, со почеток во 20 часот, концерт ќе одржи Џез Трио (Кондовски / Дробицки / Омерагиќ).

Џез триото е во состав Глигор Кондовски – виолина, Владан Дробицки – тромбон и Дени Омерагиќ – контрабас. Тие изведуваат неконцептуален современ и слободен џез-стил во комбинација на фразирање во стилот на класичната музика и импровизации. Импровизациите создаваат композиции конструирани во зададена форма.

Досега имаат објавено два музички албуми, „Away“ и „Outcasts“, за издавачката куќа „ПМГ Џез“. Албумите се приказни искажани преку музика и генерално раскажуваат четива за имиграцијата, за напуштените домови, за анксиозноста и напуштањето на младите луѓе за подобар свет, воедно и отпадништвото на уметниците кои се трудат да ја подигнат културата, како на глобално, така и на локално ниво.

– Стилот на неконцептуалност е креирана во слободните импровизации, паралелно со тоа се доловува и приказната за слободното делување, како и одговорноста на самата слобода во нас, како луѓе, а пред сѐ, како уметници. Културата која се создава преку уметноста треба во себе да ја носи анархичноста при која слободно делуваме, а при тоа создаваме и свесност за одговорноста од слободата на делување. Самите албуми и импровизацијата, кои македонската публика има можност да ги слушне, се еден поразличен вид на современа музика и карактеристика која наликува на современите камерни состави – истакнуваат од Џез Трио.

Концертот е втор во серијалот „unplugged“, што се реализира во „Салон 19.19“ во рамки на годишната музичка програма на Културно-информативен центар – Скопје за 2023 година.