Настанот „По стапките на… проф. д-р sci Томе Манчев“ претставува своевиден омаж на ликот, делото и значењето на неодамна починатиот, исклучителен македонски композитор Томе Манчев, а ќе се одржи на 27 април, со почеток во 20 часот, во Кинотеката.

Мото на Томе Манчев беше да се создаде високо квалитетно и уметничко дело со моќна експресија, високо ниво на психо-енергија, совршено композициско-техничко обликување, но и дело што ќе успее да го „предаде“ како граѓанин на Македонија. Всушност, дејноста преку која овој композитор ќе остане особено запаметен е неговата педагогија на сите степени на образование – од средно образование до докторски студии.

– Омажот е симболично навраќање конципирано преку делата на неговите студенти по композиција. Составен е од композициски начела на сега веќе реномирани творци, поранешни студенти по композиција, дела создадени под менторство на проф. д-р sci Томе Манчев – објаснуваат организаторите на настанот.

Омажот „По стапките на…“ е посветен на проф. д-р sci Томе Манчев од неговите докторанти, поширокото семејство и почитувачи на неговата музика и дејност. Омажот содржи музички композиции од Валентина Велковска – Трајановска (Исон – Симфониска поема), Горан Начевски (Седум звуци на осаменост – Седум афоризми за пијано), Михајло Штерјев (Allusioni Marini), Вулнет Таири (Симфонија бр. 15) и Борис Светиев (Concert Etudes for Piano and Symphonic Orchestra).

Миксот е на Martchin, а материјалот е снимен во музичко-продуцентското студио „Алшар“ во Скопје. Визуелизациите се на Петар Џон, а колор-корекцијата ја направи Илија Павлов.

Влезот на настанот е слободен.