Издавачката куќа „Или-Или“ во едицијата „Виртус“ ја објави книгата „Сновење“ (музички приказни) од авторката Лада Шоптрајанова Петровска. Книгата содржи 52 приказни во кои авторката на префинет и читлив начин раскажува за најголемите создавачи во музиката (Моцарт, Верди, Пучини, Дебиси, Бетовен, Сибелиус, Чајковски, Рахманинов, Шостакович), за нејзините сосоздавачи, односно изведувачи, кои живееле некогаш (Паганини, Калас), сè до приказните за нам временски блиските (Пјацола, Коен и Шпато).

– Во секоја „приказна“ има приказна – има делче од нечиј живот, што го препознаваме како наш. Токму тоа давање живот на познатите и многупати преслушувани музички дела е тоа што ги прави овие редови посебни. Во современата униформираност, површност, забрзаност и избрзаност, во трката со времето и заборавањето на себе, Шоптрајанова Петровска нè поттикнува да си дадеме малку време за себе, да си погледнеме во срцата, да си го чуеме сопственото срце и да се препознаеме во величественоста на музиката за која пишува – напиша рецензентката Славица Бабамова.

Авторката Лада Шоптрајанова Петровска (1972, Скопје) завршила основно училиште во „Ј.Х. Песталоци“, а образованието го комплетирала на ФМУ во 1994 година. По професија е виолинистка, а дополнително, по вокација – филигранистка и екологистка.

(Текстот е објавен во „Културен печат“ број 60, во печатеното издание на „Слободен печат“ на 12-13 декември 2020)