Музички дијалог помеѓу уметниците и заедниците ќе потикнат Националниот џез-оркестар и Воениот оркестар на Армијата на САД
Националниот џез-оркестар и Воениот оркестар на Армијата на САД за Европа и Африка – „Free Groove“, во духот на културната размена и пријателство помеѓу РС Македонија и Соединетите Американски Држави, ќе имаат заеднички настап на посебна музичка вечер под отворено небо. Концертот ќе се одржи на 30 јуни, со почеток во 20:30 часот, во Парк „Ибни Пајко“ во Скопје.
Препорачано
Диригент е Џијан Емин. Концертот ќе го отвори Воениот оркестар на Армијата на САД за Европа и Африка, ансамбл составен од врвни музичари што изведуваат внимателно одбран репертоар на џез, поп и современи аранжмани со висока енергија, „грув“ и силен сценски впечаток кој никого не остава рамнодушен.
Националниот џез-оркестар, како домаќин на вечерта, ќе настапи со својот уникатен музички израз и посебно селектирана програма со вокални солисти. Настанот е дел од меѓународна иницијатива за унапредување на културната размена и дијалогот помеѓу уметниците и заедниците.
Влезот на концертот е слободен.
(Текстот е објавен во „Културен печат“ број 287, во печатеното издание на весникот „Слободен печат“ на 28-29.6.2025)
