Како проект, музичката платформа „Хотел“ е основана во 2019 година, кога иницијално биле снимени и објавени пет епизоди, и тоа со Дани Димитровска, „ZeeBomb“, Наско, Шамба и „Некст ту сајленс“, по што следувала неколкугодишна пауза.

Минатата година платформата е реактивирана и биле снимени и објавени 12 нови епизоди во кои се вклучени музичките артисти аТа, Бон Праскиза, Пијан Славеј и групите „Свит рапскалионс“, КЕМ, „Занаду“, „Дејание“, „Сиото џез“, „Гарамет“, „Паркети“, „Такси конзилиум“ и „Алембик“. Моментално во постпродукција се уште 12 епизоди што ќе бидат објавени во текот на 2025 година, со артисти како „Луфтанза“, Зарина Првасевда, „Клот људи“, Херцел, Тамара Стојковска, „Мојра“ и други.

Идејата за музичката платформа „Хотел“ се родила со цел да се создаде нешто чисто, со единствена цел да ја прикаже музиката создадена од сите музичари, без предрасуди и без ограничување на еден жанр.

Тимот на „Хотел“ го сочинуваат креаторот на платформата Томи Акимовски, аудиоинженерот Алек Томевски, мајсторот на светло и камера Андреј Богатиновски, а како соработнички се приклучуваат Сара Богоева и Исаја Карадаковска, која е оперативен менаџер.

Платформата функционира на тој начин што Томи со своето искуство во музичката индустрија постојано ги следи сите новитети и ги слуша сите нови изданија. Потоа следува покана до бендовите да настапат со три-четири песни во атмосфера „како на проба“ во нивното студио во Ниже Поле. Снимениот материјал се монтира и се поставува на јутјуб-каналот „Хотел“.

(Текстот е објавен во „Културен печат“ број 268, во печатеното издание на весникот „Слободен печат“ на 15-16.2.2025)