Во Културно-информативниот центар – Скопје, во салоните „Империјал 1 и 2“, на 24 ноември, во 20 часот, ќе биде отворена самостојната изложба „Фрагментирани реалности“ на мултимедијалниот визуелен уметник Страхил Петровски.

– Изложбата е конципирана со избор на дела од мојата најнова продукција создадени оваа година и се изработени во различни медиуми и визуелни наративи: просторна инсталација, дела на хартија и редимејд-објекти поставена/и во салонот „Империјал 1“ и видеоинсталации (4 видеа) во салонот „Империјал 2“.

Што се однесува до самата нарација во делата, тука го претставувам своето наталожено искуство и став за импактот на колективната и особено лична одговорност (изгубена во лавиринтите на обременетата динамична и конфузна технолошка денешнина на информацискиот хаос…), низ комплексни слоеви од универзални значења.

Идејата има длабока стратиграфија, а јасен и концизен концепт. Поставката е чиста во минималистички дух, транспарентна и едноставно читлива. Во овој проект експериментирам и се изразувам преку дела изработени на индустриска хартија, редимејд-објекти, фотографија и видео како медиуми што имаат повеќеслојно значење, иницираат прашања и нудат различни толкувања на размислите што се однесуваат на егзистенцијалното, притоа позиционирајќи се себеси како автор и ангажиран критичар на реалноста на современото општество.

Проектот, пред сè, е моја субјективна реакција, и рефлексија на она што ми (ни) се случува во ова проблематично и турбулентно време (и години наназад), време на конфликти, од секаков тип, политички превирања и разлики – време на изместени вредности, бескрупулозност, континуиран страв и притисок од сите страни, хаос што речиси секогаш е неповратен, време на кризи и војни што влијаат врз виталноста на целата планета.

Во тој контекст оваа изложба нема за цел да ги реши проблемите, туку да генерира прашања, проблеми на свеста и совеста, да ги истражи основните вредности на нашето постоење (онтолошкото во нас како битија), слободата, напредокот, цензурата, самоцензурата – преминувајќи во фрази што се спротивставуваат на овие принципи и ја ставаат под ризик слободата на човештвото – елаборира Страхил Петровски.

Изложбата во КИЦ – Скопје е негово 20-то самостојно претставување. Куратор на изложбата е Маја Чанкуловска Михајловска, историчар на уметноста.

Претходно, во текот на оваа година, Петровски се претстави со просторна инсталација и перформанс со наслов „Гласови“ во Синагогата во Братислава, Словачка; во Уметничката галерија во Куманово со фотографска и видео инсталација со наслов „Мементо мори“; а во подготовка да излезе во декември е публикацијата од проектот од минатата година „Синергија во времето“, поставен во Велес.

(Текстот е објавен во „Културен печат“ број 205, во печатеното издание на весникот „Слободен печат“ на 18-19.11.2023)