Во женска конкуренција Каролина Мухова се пласираше во полуфиналето на грен слем турнирот „Ролан Гарос“, откако денеска во четвртфиналето ја совлада Русинката Анастасија Пављученкова со 7:5 и 6:2.

Мухова која е 43 тенисерка на светот, за 98 минути игра триумфираше над Пављученкова која е 333 тенисерка на светот.

Ова беше четврти меѓусебен дуел на чешката и руската тенисерка, а втор триумф за Мухова, со кој Чехинката првпат во кариерата избори пласман во полуфиналето во Париз.

Мухова водеше со 2:0 и 3:1 во првиот сет, но Пављученкова го сврте резултатот и поведе со 4:3. Потоа се играше гем за гем, а чешката тенисерка го доби првиот сет со 7:5.

Мухова блескаше во вториот сет, кој го освои со 6:2 и со тоа се избори за пласман во полуфиналето, каде ќе игра со победничката од мечот меѓу Украинката Елина Свитолина и Белорусинката Арина Сабаленка.

Преостанатите два четвртфинални меча ќе се играат утре, а ќе се сретнат Ига Швјонтек (Полска) – Коко Гоф (САД) и Унс Жабир (Тунис) – Беатриз Хадад Маја (Бразил).

Грен слем турнирот „Ролан Гарос“ се игра за награден фонд од 49,6 милиони евра.