Фудбалскиот клуб Шкупи не успеа навреме да ги обезбеди потребните услови за одигрување на дербито со Вардар на стадионот во Чаир, па затоа мораше да пријави алтернативен стадион за четвртото коло во Првата лига. Мечот ќе се одигра денеска на стадионот „Младост“ во Струмица од 16.30 часот.

Капитенот на Шкупи, Сухел Мухареми, верува дека по кризата во првите кола, работите ќе тргнат во позитивна насока:

– Поразите дојдоа како резултат на одредени проблеми кои сега се надминуваат. Во последните недели се подготвувавме максимално. Натпреварот против Пелистер беше голем тест за нас, но и покрај тоа што упорно баравме победа, среќата не беше на наша страна. Сето тоа го оставаме зад себе, бидејќи пред нас е мечот Вардар. Работиме само за позитивен резултат, сè друго за нас би било разочарување. Натпреварите против Вардар секогаш имаат посебна тежина за нас. Го анализиравме противникот од сите аспекти и не би издвоил ниту еден конкретен играч како најголем ризик. Како што реков и претходно, нè интересира единствено победа. Не е важно кој е пред нас, бидејќи играме условно дома. Дербито не би било дерби без „Шверцерите“. Нашата навивачка група е 12 играч, нашата најголема сила и мотивација. Без нив, не само дербито, туку и Шкупи не би бил тоа што е денес. Затоа апелирам сите да се соберат во петок и да ја поддржат екипата, бидејќи ни се потребни повеќе од кога било. Накратко, овој натпревар е важен за мене, како што е важен за секој навивач на тимот од Чаир – рече Мухареми.

Шкупи ќе се обиде да го изненади реалниот фаворит, додека за Вардар ова дерби, поради условите, нема да има тежина и атмосфера како што вообичаено би имало на едно големо градско дерби.

– Пред сè, мислам дека нè очекува тежок меч. Шкупи е Шкупи, и во каква и да е ситуација да се наоѓа, тој секогаш е сериозен ривал за нас. Ние сме фокусирани единствено на едно, победа. Ако бидеме на нивото на кое знаеме, бодовите ќе дојдат сами по себе. На последниот меч не бевме на потребното ниво и одигравме неочекувано 2:2 на домашен терен со Брера, па сега мислите ни се насочени единствено кон победа. Направивме анализа, увидовме каде грешиме и денеска ќе се обидеме да се поправиме. Ние сме Вардар, се знае што значи тоа, па дуел со Шкупи или со било кој друг противник не менува премногу. Нема да биде лесен меч, но нашиот квалитет мора да се покаже на секое излегување на терен – вели играчот на Вардар, Михаил Маневски.