Напредокот на државата кон европската интеграција, идните чекори во процесот, како и можностите за зајакнување на соработката биле во фокус на денешната средба помеѓу министерот за надворешни работи, Тимчо Муцунски и европратеникот и ко-претседавач на Мешовитиот парламентарен комитет на Република Северна Македонија и Европската унија, Карло Реслер.

Министерот Муцунски како што соопштија од МНР, ја потврдил цврстата решителност на Владата да постигне напредок на европскиот пат на земјата, обезбедувајќи стабилен реформски процес во клучните области, унапредување на економските капацитети и подобар животниот стандард на граѓаните. Притоа тој се осврнал и на добрососедските односи, потврдувајќи ја посветеноста на наша страна за нивно постојано унапредување врз основа на принципите на меѓусебна почит и доверба.

– Двете страни го нагласија значењето од одржување на конструктивен дијалог со Европскиот парламент на сите нивоа и продлабочувањето на соработката за унапредување на заедничките интереси. Министерот Муцунски му се заблагодари на европратеникот Реслер за одличната соработка и континуираната вокална поддршка на Европскиот парламент во однос на евроинтеграциите на земјата и изрази очекување дека во наредниот период со заеднички напори ќе успееме да постигнеме конкретен напредок на патот кон ЕУ, се додава во соопштението.