На 3 септември вештаците што дадоа дијаметрално спротивни дијагнози за психичката состојба на обвинетиот за трговија со дрога, Раде Трајковски – Штекли, треба да дојдат во Кривичниот суд за да ги објаснат различните дијагнози за познатиот лик од скопското подземје.

„Слободен печат“ контактираше со психијатарот и судски вештак Ѓорге Хаџи Ангеловски, кој го изработил вештачењето нарачано од одбраната. Во него тврди дека Трајковски од пред три години почнал да се повлекува, имал халуцинации и шизофрени карактеристики.

– Од пред три години, Трајковски има свој имагинарен учител, кој го подучува на патот на вечниот живот, има бизарни идеи што го преокупираат, поставил камера дома, бидејќи го преокупираат мисли дека албанската мафија се здружила против него. Има халуцинации, нарушено доживување на телото и на органите, шизофренија како психотично растројство – напишал психијатарот.

Ова негово толкување предизвика голем интерес во јавноста, па го прашавме како го коментира тоа што неговата дијагноза е дијаметрално спротивна од онаа што ја дале психијатрите од болницата во Бардовци, кои оцениле дека Штекли е свесен за своите постапи и пресметлив.

– И мене ме интересира (како вештачењата се дијаметрално спротивни – н.з.). Нормално дека стојам на тоа што сум го напишал. Детето не е добро – рече кратко психијатарот.

Психијатрите што го посетиле Штекли во притвор во Шутка по барање на Обвинителството за гонење на организиран криминал и корупција (ОЈОГОКК), не виделе ниту една од овие дијагнози.

ФОТОГАЛЕРИЈА | Штекли дојде во судот иако тврдеше дека не е психички способен да го следи судењето

„Обвинетиот има зачувана моќ на расудување и свесност за своите постапки и без тешкотии може да го следи судењето. Разграничува битно од небитно, како и исправно од неисправно“, напишала во вештачењето Оливера Суботин-Поповска, психијатарка во болницата „Бардовци“.

Обвинителството најави и дека, ако е потребно, ќе обезбеди и докази од податоците од телефонот на Штекли за да помогнат во утврдувањето на вистината.

Откако ќе сведочат психијатрите, Судот ќе одлучи на кое вештачење ќе му верува. Ако дилемата не се реши на судското рочиште, странките може да побараат, а судот да нареди ново психијатриско супервештачење, што сигурно ќе го одолговлечи судскиот процес против Штекли и неговата група.

Штекли тврдел дека не е психички способен да го следи судењето – наместо во болница во затвор чека полициска асистенција

Штекли и уште девет лица седнаа на обвинителна клупа, но уште четворица од групата, меѓу кои и поранешниот спортски директор на фудбалската репрезентација Данчо Масев, признаа вина. Освен за Штекли, Обвинителството поднесе обвинение и за наркогрупата „Беланоца“, односно за лидерот Фатљум Ајети Тоте, кој од затвор нарачал четири убиства.

– Раде Трајковски Штекли и Беланоца/Барон имаат меѓусебна комуникација. Лојалност меѓу нив нема и не прават заедно кривични дела – тврдеа од ОЈО ГОКК.Групата на Штекли ја криела дрогата на градежно земјиште во државна сопственост. Дрога продавале и на интернет, но најчесто во кафуле во Аеродром, без за тоа да знае сопственикот.

Штекли преживеа три обиди за убиство – два во трговскиот центар „Ист гејт“, а експлозивна направа му беше фрлена во дворот од неговата куќа во Ќерамидница.