Името на Еди Терас, можеби не им е познато на фановите на европската кошарка. Сепак, белгискиот плејмејкер сè уште држи рекорд кој изгледа невозможно да се сруши.

Играчот висок 1,83 метри имаше неверојатна партија на Европското првенство одржано во 1957 година, постигнувајќи 63 поени во победата на неговиот тим над Албанија од 90:48. Никој досега не го надминал тој рекорд.

На претстојното Европско првенство има неколку играчи кои, со своите импресивни настапи, би можеле да го загрозат достигнувањето на Терас: Лука Дончиќ (Словенија), Лаури Марканен (Финска) и Јанис Антетокумпо (Грција), пишува добро познатиот шпански медиум Марка.

Пред три години, ѕвездата на словенечката репрезентација Дончиќ веќе го постави вториот највисок рекорд за постигнување поени во еден натпревар на сите времиња, постигнувајќи 47 поени против Франција.

Најдобриот просек на постигнувања на турнири во историјата на Евробаскетот му припаѓа на легендарниот Никос Галис, кој во просек постигнуваше 37 поени по натпревар во 1987 година, кога ѝ ја донесе на Грција првата континентална титула. Тоа е уште еден рекорд кој изгледа тешко да се сруши.