На 37. „Поетска ноќ во Велестово“ ќе настапат шеснаесет поети, музичари и уметници од вкупно од шест држави (Ирска, Азербејџан, Хрватска, Романија, Бугарија и Македонија).

Програмата на традиционалната манифестација „Поетска ноќ во Велестово“ ќе почне на 15 август, во 21 часот, во Велестово, со поетски портрет на Андреј Ал-Асади, едно од водечките имиња во македонската современа поезија, по што ќе следува интернационалното поетско читање „Имаго“, на кое ќе настапат поети од странство: Рошин Кели (Ирска), Фарид Хусеин (Азербејџан), Рената Јамбрешиќ Кирин (Хрватска), Мирослав Кирин (Хрватска), Поли Муканова (Бугарија) и Анисија Ангел (Романија).

Истата вечер, од 22:30 часот, во тремот на црквата „Успение на Пресвета Богородица“ во с. Велестово ќе биде отворена и изложбата „Непредвидливи соочувања“ на академскиот сликар Стефан Младеновски.

Следните два дена ќе се одржат и две книжевни промоции на стихозбирки од Мирослав Кирин од Хрватска и на Фарид Хусеин од Азербејџан, како и две интернационални поетски читања, едното во тремот на црквата „Успение на Пресвета Богородица“ во с. Велестово и завршното поетско читање, кое ќе се одржи в недела, на 17 август, во кафе и бар „Шила“ во Охрид, на кои, покрај споменатите поети, ќе настапат и Рошин Кели од Ирска, Рената Јамбрешиќ Кирин од Хрватска, Поли Муканова од Бугарија, Анисија Ангел од Романија, како и домашните поети: Лулзим Хазири, Ивана Јовановска, Марија Ангеловска, Емануела Ковачевска Китановска, Маја Мојсова, Павлина Атанасова и Стефан Костоски.

Во програмата е предвиден и кус музички концерт на Игор Климовски (соло хармоника), како и организирано разгледување на културно-историското наследство на Охрид и природните убавини на Националниот парк „Галичица“.

Во рамки на програмата ќе бидат промовирани стихозбирката „Зебрано“, избор песни од Мирослав Кирин (Хрватска) во препев на Славе Ѓорѓо Димоски, издание на „ПНВ Публикации“, на 16 август во тремот на црквата „Успение на Пресвета Богородица“ во с. Велестово и стихозбирката „Како сон“, избор песни од Фарид Хусеин (Азербејџан) во препев на Јулијана Величковска, издание на „ПНВ Публикации“, на 17 август во кафе и бар „Шила“ во Охрид.

Постерот за годинашното издание на фестивалот е посветен на пеперугите на Галичица, со цел да се подигне свеста за нивната заштита. Автор на постерот е Андреј Павлов.

Фестивалот е поддржан од Министерството за култура и туризам, од Општина Охрид и од Комерцијална банка АД Скопје, а гостувањето на поетесата од Ирска е помогнато од Литературниот центар „Мунстер“ од Корк и Советот за уметност на Ирска.

(Текстот е објавен во „Културен печат“ број 293, во печатеното издание на весникот „Слободен печат“ на 9-10.8.2025)