Марко Бецеки беше најбрз на првиот тренинг пред историската трка на патеката Буда, а ова саботно утро го постави и најбрзото време во квалификациите за Големата награда на Индија, прва трка во оваа земја во рамките од Мото ГП шампионатот.

Во апсолутна доминација на мотоциклите на Дукати, Италијанецот Бецеки имаше најдобро време од 1:43.947, пред Хорхе Мартин и Франческо Бањаја.

Утринава борбата за стартните позиции ја одбележа падот на Алекс Маркез од неговиот „Гресини Дукати“, поради што Шпанецот се здоби со скршеница на ребро и за него овој тркачки викенд заврши.

Беше тензично во тимот на Априлија, чии шефови направија грешка и го испратија Алеш Еспаргаро на патеката порано отколку што требаше, па го повикаа назад во „боксот“ за дополнително загревање на гумите.

На осум трки до крајот на сезоната, моментно во генералниот пласман води Бањаја со 283 поени, пред Мартин со 247, а трет е Бецеки со 218.