Градоначалникот на Москва Сергеј Собјанин денеска изјави дека руската престолнина ќе го продолжи училишниот октомвриски распуст на две недели, како дел од мерките за запирање на ширењето на коронавирусот.

Мерката следи по препораката на Собјанин минатата недела сите со здравствени проблеми и оние над 65 години да останат дома.

Собјанин рече дека учениците нема да одат во училиште помеѓу 5 и 18 октомври и ги повика родителите да обезбедат нивните деца да останат дома во тој период.

„Денес, децата претставуваат значителен дел од заразените и тие често немаат никакви симптоми”, напиша Собјанин на својата веб-страница.  – Кога ќе дојдат дома, тие лесно можат да го пренесат вирусот на возрасните и постарите членови на кои ќе им биде многу потешко ако се разболат, рече тој.

Русија пријави дека во последните 24 часа се евидентирани 8.232 нови случаи на коронавирус, а земјата сега има вкупно 1.167.805 случаи. Властите соопштија дека починале 160 лица, и бројот на жртвите сега изнесува 20.545. Русија е четврта во светот по бројот на заразени.