Момчиња нападнати во „57-ца“ на Бит-пазар, градоначалникот на Бутел вели: Ништо ново, МВР итно да реагира
Четири момчиња вчеравечер биле нападнати во скопски градски автобус на Бит-пазар, а напаѓачите се уапсени, соопшти МВР.
Препорачано
„На 13.11.2022 во 01.10 часот на подрачје на Бит Пазар од полициски службеници од Единицата за интервентна полиција при СВР Скопје лишени од слобода се Л.Б.(18), Б.М.(19), В.Х.(19) и уште двајца малолетници, сите од Скопје, затоа што Т.Т.(46), И.М. (47), Л.Ѓ. (50) и Т.Ѓ. (43) сите од Скопје пријавиле дека околу 00.40 часот нивните четири малолетни синови во автобус бр.57, во населба Чаир, Скопје на автобуска постојка физички биле нападнати од пријавените“, се вели во полициското соопштение.
Околу случајот реагираше градоначалникот на Бутел, Дарко Костовски, кој вели дека во последниот период зачестиле напади во Чаир врз деца кои навечер се враќаат дома од центарот на градот. Костовски бара МВР итно и одлучно да реагира околу последните инциденти.
„Оставив неколку дена со цел да не предизвикам дополнителна паника. Но по вчерашниот случај кој е дел од низа случаи насилство во автобусот 57, каде веќе извесен период особено во последниов месец на територија на општина Чаир се напаѓаат деца од Радишани и Бутел кои се враќаат дома од центарот на градот. Чашата е прелиена, како градоначалник на општина Бутел лично од министерот за внатрешни работи Оливер Спасовски барам брзо, остро, и без никакво заташкување да реши овој проблем, додека не е предоцна“, вели Костовски во реакцијата.
„Остро ги осудувам сите кукавички напади врз мирни млади деца кои дома ги воспитуваат дека насилството како опција не постои и треба да се остави во 19сетиот век. Не сакам да верувам дека овие чинови имаат било каква позадина, и затоа велам насилството раѓа насилство и од таму сите надлежни органи ги повикувам да реагираат веднаш! За неколку дена од сега како градоначалник на Бутел ќе организирам тркалезна маса на која ќе бидат повикани челниците на МВР, лидерите на верските заедници и претавници на загрижените родители, се со цел од блиску да ја следиме ситуацијата и да превенираме додека не е доцна. Доколку е потребно ќе формираме посебно тело за решение на оваа загрижувачка ситуација“, додава градоначалникот на Бутел.
