20-годишно момче од селото Теарце е пронајдено починато на паркинг пред станбена зграда во Тетово, а полицијата уапси шестмина поврзани со случајот, кој според МВР има врска со недозволена трговија и користење дрога.

„На 01.03.2023 во 17.00 часот во СВР Тетово било пријавено дека во тетовската Клиничка болница бил донесен починат 20-годишниот А.А. од тетовско Теарце. На паркинг пред станбена зграда на улица „Илинденска” во Тетово, каде според пријавеното бил пронајден починат А.А., увид извршиле Јавен обвинител и екипа од СВР Тетово. По наредба на Јавен обвинител била извршена обдукција“, велат од полицијата.

„Во врска со случајот, во 18.10 часот на улица „Илинденска” во Тетово, полициски службеници на СВР Тетово ги лишиле од слобода Л.Д.(23), Ј.С.(24), А.О.(25), А.О.(35) и П.A.(71), сите од Тетово, поради сомнение за нивна инволвираност во неовластено производство и пуштање во промет на наркотични дроги, психотропни супстанци и прекурсори и овозможување употреба наркотични дроги, а ноќта (02.03.2023) во 01.10 часот на улица „113″, од слобода бил лишен и Б.Х.(19) од Тетово“, додаваат од полицијата.

Уапсените биле задржани во полициска станица и се преземаат мерки за целосно расчистување и документирање на случајот.