Студентското пленумско движење бара јавно извинување од операторот и одговорните лица задолжени за работата на видеобимот на плоштад Македонија, каде синоќа се одржа протестен собир на кој граѓаните оддадоа почит и заедничко сеќавање за загинатите во пожарот во Кочани.

Оттаму велат дека на граѓанскиот собир, кој беше најавуван неколку денови претходно, 16 минутниот молк со кој се оддаде почит кон жртвите и солидарност кон нивните најблиски, беше нарушен од континуираните прегласни реклами кои кружеа на видеобимот.

„Наместо да кружат реклами, што симболично го прикажува отсуството на елементарни вредности во нашето општество, видеобимот требаше да биде изгасен во текот на молкот, или уште почовечно, на него да биде прикажана порака во солидарност со семејствата и настраданите“ се вели во реакцијата.

Синоќа на плоштадот „Македонија“ во Скопје, по повод шест месеци од трагедијата во Кочани, граѓанската иницијатива „Кој е следен“ одржа протестен собир, кој почна во 20:16 часот, со минута молк за 62-те жртви, млади луѓе кои го изгубија животот во катастрофалниот пожар во импровизираната дискотека.

На плоштадот беше поставена и кутија во која граѓаните можеа да остават напишани пораки за родителите.

ВИДЕО/ГАЛЕРИЈА: „Шест месеци без правда за Кочани“ – скопјани ги поддржаа семејствата на загинатите во „Пулс“