Се чини дека заврши „медениот месец“ за новиот германски канцелар Олаф Шолц, кој сега за првпат од преземањето на функцијата се соочува со доста критики во и надвор од Германија. Молкот на Германија околу украинската криза ги остави нервозни голем број Германци, пишува Гардијан.

Шолц, кој со неговата коалиција веќе два месеци ја води најмоќната европска економија, е критикуван од страна на Киев и останатите источни метрополи, бидејќи цврсто се задржал на строгите германски ставови околу испораката на оружје во ризичните региони.

Оваа недела, германскиот канцелар беше критикуван и од Берлин.

„Какво е чувството кога сојузниците го класифицираат ставот на Германија како несигурен?“ беше прашан Шолц во интервју за германските телевизии.

Шолц го негираше ваквиот став.

Додека поранешната канцеларка, Ангела Меркел ретко се истакнуваше како оратор во ваквите прашања, Шолц „како да сака да ја надмине неа во уметноста на исчезнувањето“ пишува германски Шпигел, опишувајќи ги неговите ставови за оваа тема како „прилично непостоечки, односно нечујни“.

Најбитниот партнер на Германија

Германците традиционално ги сметаат САД за нивни најбитни партнери, се вели во извештај од ноември 2021 година направен од страна на фондацијата Корбер.

Помалку од 5% од луѓето кои го дале своето мислење во извештајот ја сметаат Русија за побитен партнер.

Целосно гледајќи, Германците не ги сметаат Путин и Русија ни за директна закана.

Но, молкот на Шолц и германската Влада околу руско-украинската криза нема да ги задоволат нивните гласачи, вели Лиана Фикс, експерт за Русија од фондацијата Корбер.

„Германците можеби не сакаат нивната држава да испраќа оружје, но сакаат нивниот лидер да биде клучен во тие дипломатски односи. Тоа е нешто на кое Шолц мора да поработи“ вели Фикс.

Берлин и Лондон делат заеднички став за Киев

Британскиот премиер Борис Џонсон и германскиот канцелар Олаф Шолц се согласија дека западните сојузници мора да испратат јасна и конзистентна порака до Русија за последиците од евентуална инвазија на Украина.

Двајцата лидери се согласија и за важноста на дијалогот со Русија, со порака дека ќе се обидат да ги искористат сите дипломатски канали со кои располагаат за да се стави крај на сегашната тензија, се наведува во соопштението од Велика Британија.

Премиерот Џонсон и канцеларот Шолц ја подвлекоа потребата сојузниците да испратат јасна и конзистентна порака до Русија, вклучувајќи ги и последиците од евентуалната руска инвазија на Украина, се вели во соопштението

Тие се согласија да продолжат да работат заедно и со другите меѓународни партнери на сеопфатен пакет санкции.

Британскиот премиер нагласи дека санкциите треба да бидат подготвени веднаш да стапат во сила во случај на натамошен упад на Русија во Украина.