Сите оние граѓани кои скенирале фискални сметки од 1 до 31 јануари, денеска може да очекуваат да бидат меѓу 15-те најсреќните граѓани кои ќе добијат по 100.000 денари од наградната игра „МојДДВ#МојаНаграда“.

Вечерашното јавно извлекување ќе се случи на една од националните телевизии веднаш по завршувањето на наградната игра „Лото“, при што ќе бидат познати добитниците на 100.000 денари од второто коло од наградната игра „МојДДВ#МојаНаграда“.

Како што е веќе познато во првото коло на наградната игра „МојДДВ #МојаНаграда“ учествуваа 132.261 граѓанин, коишто скенирале вкупно 5.398.855 сметки. Тоа беше прво од 12 месечни извлекувања на 15 награди од 100.000 денари, со електронски генератор по случаен избор.

По почетокот на „МојДДВ #МојаНаграда“, во декември се зголемија бројот на скенирани сметки и наплатениот ДДВ во однос на претходниот месечен просек од јули до ноември. Така на пример во декември бројот на скенирани сметки е за 53% повисок во однос претходниот месечен просек, додека наплатениот ДДВ од фискалните сметки е за 59% повисок.

Граѓаните кои учествуваат во наградната игра МојДДВ #Моја награда не само што имаат можност да добијат една од 3.852 парични награди, со вкупен фонд од половина милион евра, туку и секои три месеци добиваат поврат на ДДВ и што е најважно, придонесуваат во борбата против сивата економија.