Ходниците во монтажната болница кај Инфективна клиника се полни со дупки и вдлабнатини, испакнатини и невозможно е преку нив да помине инвалидска количка или кревет со тркалца без да пропадне, но министерот за здравство Арбен Таравари се мисли да го предаде овој објект на Затворот „Идризово“ во Скопје. Во меѓувреме оваа модуларна болница ќе ја користи Министерството за одбрана.

Таравари од Штип каде што беше во посета на тамошната клиничка болница рече дека со владина одлука модуларната болница ќе биде преземена од страна на Министерството за одбрана.

-За модуларната болница на Инфективна клиника веќе има одлука на Влада со која таа болница треба да ја преземе Министерството за одбрана. Има и друга идеја бидејќи треба болница за затворот „Идризово“. Сега сме во дилема дали таа модуларна болница да ја пренесеме таму за да служи како амбуланта – рече Таравари.

Во мај годинава Европскиот комитет за спречување на тортура и нехумано или понижувачко постапување или казнување (КПТ) при Советот на Европа, во извештај констатираше дека продолжува несоодветната примена на одредбите за здравствена заштита во затворите, поради недоволен персонал и несоодветен медицински преглед на новопристигнатите затвореници и третман на затворениците со проблеми поради употреба на наркотици. Во извештајот му се препорача на Министерството за здравство да покаже поголемо лидерство.  

Министерот во јули најави дека ќе се отстрани модуларната болница до Инфективната клиника во Скопје и на тоа место пак ќе се направи читална за студентите на Медицинскиот факултет.

Модуларната болница во ковид-пандемијата имаше 72 кревети и се користеше за хоспитализирање на тешко болните.