Главните наоди од проектот „Мерење на перцепциите за нивото на корупција во јавните институции во Полошкиот регион“, спроведен од академскиот кадар и студентите на Правниот факултетот при Универзитетот во Тетово, во соработка со Vrije Универзитетот од Амстердам, покажаа различни форми на манифестирање на корупција во јавните институции во полошко.

Во презентацијата на проектот, стои дека корупцијата е најзастапена во судството и политичките партии. Над 75 % од анкетираните сметаат дека во последните 5 години е зголемено нивото на корупција, а речиси половина од нив, одговориле дека биле подложни на некаков вид корупција, со цел да им се забрза одредена процедура за да завршат некоја работа, во рамки на институциите на системот.

Поголемиот број од испитаниците одговориле дека митото најчесто се бара од административците, но индиректно.

И покрај зголеменото ниво на корупција, она што загрижува е самиот податок дека над 90% од анкетираните, воопшто не пријавиле дека биле предмет на корупција.

Има многу сомнежи за корупција во работата на институциите во полошко, кажа по презентацијата на проектот Јусуф Зејнели декан на Правниот факултет при Универзитетот во Тетово.

„Овие заклучоци можат да ги користат јавните инстицуции кои ќе помогнат за менување на нивните политиките во однос на почитување и спроведување на законот“, рече деканот на Правниот факултет при Универзитетот во Тетово Јусуф Зејнели.

Зејнели вели дека дебатите и анализите околу темата корупција која е актуелна, се од суштинско значење за борба против оваа појава. Најпрвин мора да се работи на промена на менталитетот и свеста за поимот корупција, додава тој.

„Ние цениме дека ова е наш придонес за граѓаните да бидат информирани за нивото на перцепција, за функционирање на правната држава. Ние сите имаме одговорност да дадеме придонес во оваа насока. Знаеме дека ова е актуелна тема на ниво на нашата држава и поради тоа сакаме да даваме придонес, има малку измени во однос на перцепцијата на граѓаните во однос на корупцијата, секако дека тоа не е во ред, треба да се промени менталитетот, сите служби да работаат постручно и да се почитуваат законите за да функцинираме како правна држава, да бидеме дел од ЕУ, дека тоа го заслужуваме“, вели Зејнели.

Проектот „Мерење на перцепциите за нивото на корупција во јавните институции во Полошкиот регион“, вклучи 400 – тини луѓе од 9-те општини од полошкиот регион.