Младите колеги од новинарската секција во Основното училиште „Киро Глигоров“ во Скопје направија интервју со четвороодделенката Вида, која на Денот на шегата 1 април се истакна со маската „Младата новинарка“, изработена целосно од страниците на нашиот и вашиот весник „Слободен печат“, заради која ѝ подаривме книги.

На Фејсбук-страницата на училиштето тие го најавија разговорот со Вида со следниот текст:

– Пред неколку дена нашето училиште беше преполно од креативни и убави маски, но маската „Млада новинарка“ на нашата другарка Вида од четврто одделение ни го привлече особено вниманието. Денес нашите новинари се дружеа со Вида која беше пресреќна поради подарокот кој го добила од нашите повозрасни колеги од „Слободен печат“. Ѝ честитаме на Вида за подарокот и ѝ посакуваме да чита што е можно повеќе – напишаа помладите колеги.

Во разговорот Вида открива дека повеќе сака да биде учителка и дека многу сака да чита книги, затоа што смета дека е мала да чита весници.

Дознаваме дека во училиштето „Киро Глигоров“ не стивнува возбудата околу откривањето на новинарската професија и дека дел од учениците сакаат да ја посетат нашата редакција, за да се запознаат одблиску со новинарските предизвици и со процесот на создавање весник.

Со задоволство ќе ги примиме младите новинари во нашите простории и нивната наставничка Ленче Кузмановска и ќе им одговориме на сите нивни новинарски прашања.

Маската „млада новинарка“ ќе добие комплет книги од „Слободен печат“

Малата Вида доби книги од „Слободен печат“, за маската „Младата новинарка“