Младинската кошаркарска репрезентација на Македонија со победа против Ирска од 77:66 го потврди пласманот во нокаут фазата на Европското првенство во „Б“ дивизијата.

Првата рунда македонските млади кошаркари ја завршија како првопласирани во групата А со скор од 3:1, како и Бугарија и Чешка со кои имаме 1:1 во меѓусебните дуели, но ние сме лидери поради подобриот кош-количник.

Ирците денес се држеа само во првата четвртина која ја завршивме со предност од 18:12, па во втората веќе го трасиравме патот кон победата со 27:9. Се останато до крајот беше само рутинско одржување на предноста за сигурна победа.

Најефикасен кај нас и во овој натпревар беше Теодор Симиќ со 17 поени и осум скока, а зад него следуваа Амар Хот со 15 поени и 13 скока, додека Филип Наков уфрли 10 поени.

Прв противник на патот кон елитата ќе ни биде Велика Британија против која ќе играме четвртфинале в петок од 18:30 во СРЦ „Кале“. Пласман во „А“ дивизијата ќе обезбедат најдобрите три селекции од оваа второлигашко првенство.