Најтрофејниот словенечки фудбалски клуб Марибор го промовираше новото летно засилување, Бехар Фета. Станува збор за 20-годишно крило, член на македонската У21 репрезентација. Официјално Фета потпиша договор на три години.

– Се работи за млад, талентиран фудбалер, репрезентативец на Македонија, профил на играч кој е намерно избран. Има динамика, брзина, способен во ситуациите „еден на еден“. Минатата сезона се истакна во својот клуб и имаше значајна улога што Воска Спорт избори пласман во Првата лига, но сега сакаше да направи чекор напред во кариерата – изјави спортскиот директор на Марибор, Марко Шулер.

Го привлече вниманието на Марибор со неговите настапи, во 28 натпревари имаше 29 голови во второлигашката конкуренција.

– Првите впечатоци се одлични, многу сум среќен што сум овде. Ова е важен чекор напред во мојата кариера, во нашите простории сите добро знаеме што значи 16-кратниот шампион на Словенија и каква историја има. Тоа е голем предизвик за еден млад играч и едвај чекам да се приклучам на тимот на тренинзи, натпревари. Најтешко е да се зборува за себе, но мислам дека се истакнувам по брзина, најдобро се наоѓам во улогата на крилен напаѓач на левата страна.

Првите фудбалски чекори ги направив во мојот роден град, во Фортуна од Скопје, потоа се преселив во Шкендија и стекнав членство во клубот од Охрид, Воска Спорт. Во првата сезона не успеавме, бидејќи загубивме во дополнителните квалификации, но во втората обезбедивме пласман во Првата лига. Така ја започнав третата сезона во прволигашката конкуренција, одиграв два меча, но дојде повик од Марибор и решив да се префрлам. Сакам да имам што повеќе минути на теренот, да дадам свој удел во реализацијата на клупските цели и се надевам дека ни претстои успешно продолжение на сезоната – вели Фета.

По четири одиграни кола во новата сезона од словенечкиот шампионат Марибор ја дели првата позиција со Целје со по 10 бодови.