Претседателот на Собранието, Јован Митрески побарал од координаторите на пратеничките групи да ги информираат пратениците дека доколку е потребно ќе закаже итна собраниска седница во текот на денешниот ден со цел да се надмине состојбата која произлезе од примената на Преспанскиот договор, односно проблемот кој се појави со возачките дозволи. Пратеничката група на СДСМ најави дека ќе поднесе предлог за законските измени, а од ВМРО-ДПМНЕ веќе ги поднесоа до архивата на Собранието.

– Митрески истакна дека има најави дека пратеничките групи ќе достават различни предлози за законски измени, поради што нагласи дека пратеничките групи треба да дејствуваат координирано за да се дојде до најбрзото и најдоброто решение, кое ќе биде во интерес на граѓаните, а кое во исто време нема да наштети на почитувањето на меѓународните правни акти кон кои како држава сме се обврзале, информираат од Собранието.

Од Парламентот посочуваат дека Митрески најавил оти уште денеска ќе иницира состаноци со министрите за внатрешни работи, за финансии, за надворешни работи, како и со првиот човек на Агенцијата за супервизија на осигурувањето.

Истовремено, претседателот на Собранието информираше дека ќе одржува ад хок состаноци со координаторите на пратеничките група со цел заеднички да најдат решение за настанатата ситуација, известуваат од законодавниот дом.

СДСМ поднесува законски измени за продолжување на важноста на возачките дозволи

-Пратеничката група на СДСМ ќе поднесе предлог за законски измени со кои возачките дозволи, сообраќајните дозволи, осигурителните полиси и сообраќајните книшки ќе им биде продолжена важноста, изјави денеска пратеникот од владејачката коалиција Дарко Каевски.

ВМРО-ДПМНЕ веќе ги подготви законите и ги поднесе до архивата на Собранието.

-Дополнително со тоа поднесовме и барање за свикување на итна седница со потписи од 20 пратеници. Претседателот на Собранието може да ја свика седницата во текот на денешниот ден, соопштија од ВМРО-ДПМНЕ.

Џафери: Се најдов во „цајт нот“, но ќе имаме соодветна одлука за личните документи во полза на граѓаните

Од Демократскиот сојуз предлагаат преку измена на законите да се продолжи рокот на важноста на личните документи – лична карта, пасош и возачка дозвола, како и сообраќајните дозволи, сè со цел да не се блокира нормалното одвивање на животот на граѓаните и функционирањето на институциите.

-Во оваа насока предлагаме личните карти да можат непречено да се користат до определениот рок на важност, нашите државјани кои се во странство патните исправи во странство да можат да ги користат до денот на важноста и да можат слободно со нив да се вратат во Македонија, како и возачките дозволи да можат да се користат во Македонија до денот на важноста. Исто така и сообраќајните дозволи да можат во Македонија да се користат до денот на важноста, доколку не е направена промена, соопштија од партијата.

Пендаровски: Никој не смее да биде казнет поради непроменета возачка дозвола

Патниот лист за враќање во Македонија со стар пасош ќе чини 30 евра