Вработените во аквариум во Северна Каролина останале збунети откако ража останала бремена и покрај тоа што немало мажјак во нејзиниот резервоар. Научниците имаат неколку теории за тоа како тоа би можело да се случи – а едната вклучува машка ајкула, пренесува Сајенс Алерт.

Лабораторијата во Хендерсонвил првично била загрижена дека ражата е болна кога почнала да отекува. Сепак, ултразвукот подоцна открил дека израстоците се всушност јајца, вели извршниот директор на лабораторијата.

Директорката Ејприл Смит вели дека едно од можните објаснувања е партеногенезата, процес во кој женката може асексуално да произведе ембрион без јајце клетката да биде оплодена со сперма.

Таа рече дека ова е механизам за преживување кој овозможува зачувување на еден вид и обично се случува во ситуации кога нема мажјаци, како на пример во зоолошка градина или аквариум или дури и во затскриена област на длабокото море.

Меѓутоа, научниците развиле друга теорија кога забележале траги од каснување на ражата. Ражата го делела својот резервоар со две мали машки ајкули.

„Тогаш ни светна сијаличката, ајкулите касаат кога се парат, па се запрашавме дали една од нив се пареше со неа?“ напиша Смит.

Таа вели дека најновиот ултразвук открил дека ражата била бремена со две, можеби три младенчиња. Директорката објасни дека нивната теорија ќе треба да се потврди по раѓањето, освен ако прво не пронајдат визуелни индиции за мешана раса.

Ајкулите и раите се тесно поврзани, така што вкрстувањето е теоретски можно. Животното треба да се породи во наредниве денови, а Смит рече дека ажурирањата ќе бидат објавени на нивната веб-страница и страница на Фејсбук.