Мирчеа Луческу (79) после четири децении повторно е селектор на фудбалската репрезентација на Романија. Романија доби нов кормилар по настапот на Европското првенство во Германија под водство на Едвард Јорданеску.

Одлуката на тамошната федерација за многумина е доста интересна и изненадувачка, но факт е дека фудбалската репрезентација ќе ја предводи еден од најпознатите романски тренери на сите времиња.

– Верувајте ми, направив сè за да не се случи ова и повеќе би сакал да видам како младите тренери добиваат шанса. Никогаш не размислував да се вратам. Се обидов да го убедам Едвард Јорданеску да остане селектор, како и фудбалската федерација, но без успех.

Разговарав со Георге Хаџи, кој заслужува да стане селектор. Ако нема друго решение, тогаш моја должност е да го прифатам овој предизвик – вели Луческу.

Луческу во својата долга и богата кариера раководеше со Динамо Киев, Турција, Зенит, Шахтјор, Бешикташ, Галатасарај, Интер, Бреша, а пред 38 години по пет години работа се повлече од функцијата романски селектор.