На Комисијата за заразни болести се дискутирало да се набави лекот против ковид-19 „паксловид“ ама не сега, туку во иднина, ако се зголеми бројот на позитивни случаи, дознава „Слободен печат“ од свои извори во Комисијата. Министерството за здравство навело дека набавката ќе оди лесно и дека во моментот кога ќе побараат количини од производителот, ќе има доволно на располагање, тврдат нашите извори од Комисијата.

Во меѓувреме, професор доктор Драган Даниловски на различни начини алармира дека овој лек е спас за некои повозрасни граѓани и хронично болни, доколку нема контраиндикација да го примат. Инаку, „паксловид“ е лек наменет за пациенти со лесна и средна клиничка слика кои имаат реален ризик да добијат тешка болест или да починат од ковид-19. Тука спаѓаат повозрасни граѓани, хронично болни, екстремно обезни пациенти итн. Овој лек се добива на рецепт откако лекарот ќе направи увид во лекарствата што пациентите редовно ги пијат за други здравствени проблеми. Не смее да се даде ако се пијат одредени други лекови на пример против згрутчување на крвта, шизофренија, висок крвен притисок, симнување на мастите итн.

-За тие пациенти не е „паксловидот“. За нив решение е новата апдејтирана вакцина која ја има само во САД од 14 септември. Во Европа уште ја нема, а ниту кај нас, тврди доктор Даниловски.

Претседателот на Комисијата за заразни болести професор доктор Александар Петличковски за „Слободен печат“ вели дека на минатиот состанок на Комисијата разгледана е состојбата со достапните лекови и инфектолозите сметаат дека има различни видови лекови за ковид во болниците и во доволни количини. Меѓутоа, неделава ќе се формира нова работна група главно од клиничари кои ќе дефинираат дали треба да се набават дополнителни лекови и неделава ќе се знае дали листата ќе се прошири.

-„Паксловид“ во моментот нема никаде во државата, додаде доктор Петличковски.

И додека Македонија чека да се влоши епидемиолошката состојба па дури тогаш да го набави, за соседна Србија „паксловид“ е „стара вест“. Уште во февруари 2022 година во соседството пристигна првиот контингент од овој лек, а Министерството за здравство на Србија го набави само 10 дена откако Европската агенција за лекови (ЕМА) го одобри.

„Лекот ‘паксловид‘ е антивирусен лек кој содржи две компоненти, ритонавир и нирметрелвир и е наменет за орална употреба. Индициран е за третман против ковид-19 инфекции кај возрасни кои не се на кислородна поддршка и кои имаат зголемен ризик за прогресија и тешка форма на болеста. Со примената на лекот се препорачува да се почне во првите пет дена од појавата на симптомите“, соопштија тогаш од Министерството за здравство на Србија.

Таблетите „паксловид“ кои ги произведува „Фајзер“ се веќе одобрени и во САД, Канада и Израел. Во САД на пациентите им се дава во домашни услови за да не стигнат до ниво да бидат хоспитализирани. Но, кога ќе се погледне упатството за употереба, евидентно е дека лекот не смее да се зема доколку пациентот веќе прима различни видови терапии, почнувајќи од лекови за ангина, некои терапии против канцер, шизофренија, депресија, за запирање на прекумерно крварење после породување или абортус, но и некои лекови против висок крвен притисок.

„Паксловид“ е првата антивирусна таблета одобрена од Агенцијата за храна и лекови на САД за третман на ковид кај возрасни. Нејзината ефикасност примарно е потврдена со резултатите од клиничко испитување кое е рандомизирана, двојно слепа, плацебо контролирана клиничка студија. Во неа се испитувало како делува „Паксловид“ за третман на нехоспитализирани симптоматски возрасни пациенти кај кои лабораториски било потврдено присуство на ковид-19. Пациентите биле повозрасни од 18 години со претходно специфицирани фактори на ризик, и исто така биле повозрасни од 60 години независно од хроничните болести. Сите учесници во студијата немале примено вакцина против ковид 19 и немале прележано ковид.

„Паксловид значително ја намали пропорцијата на луѓе хоспитализирани поради ковид и ја намали смртноста од која било  причина за 86 проценти, споредено со групата која прими плацебо и не прими моноклонално антитело пет дена по појавата на симптомите. Во оваа анализа 977 пациенти примија „паксловид“ а 989 пациенти примија плацебо. Меѓу овие пациенти 0.9 проценти од тие што примија „паксловид“ беа хоспитализирани со ковид или пак починаа од каква било причина во периодот од 28 дена по примањето на „паксловид“. Од групата што прими плацебо, 6,5 проценти завршија во болница или починаа“, пишува на сајтот на Агенцијата за храна и лекови на САД. Но, лекарите исто така треба да ги имаат предвид другите лекарства што ги прима пациентот пред да одлучат дали ќе му дадат „паксловид“ наведуваат од ФДА.