Министерството за култура повторува дека кратење на буџетот за филм нема да има откако своите стравувања за кратењето на буџетот за филмска дејност ги изрази и Агенцијата за филм и реномирани македонски режисери и продуценти преку отворено писмо до јавноста.

-Со оглед на новото соопштение на Агенцијата за филм, информираме дека, сите обврски кои Агенцијата ги има преземено кон своите корисници, ќе бидат навремено сервисирани, согласно динамиката и месечните планови, соопшти Министерството за култура.

Претходно Агенцијата за филм на Република Северна Македонија соопштува дека во моментов се најавени два филма за снимање во Македонија за што се веќе пристигнати интернационални екипи на земјите учесници во проектите и нагласи дека финансиските средства планирани за овие и други проекти се потребни веднаш и не може да чекаат на прераспределба меѓу буџетските корисници и активностите на Министерството за култура за исплата на проектите до крајот на годината.

-Доколку овие планирани средства не се стават во функција на проектите како што е планирано и не се исплатат веднаш, се нанесува директна штета на самите проекти бидејќи ќе се случи зголемување на буџетите изразено во илјадници евра и ќе се наштети на реномето на македонската кинематографија, нагласуваат од Агенцијата за филм и побараа Министерството да ги разгледа и ревидира одлуките на за прераспределба на средствата од причина што во спротивно штетата би била од огромни размери за македонската кинематографија која моментално е наш најголем културен амбасадор.

Уште еднаш до Министерството за култура реагираа и 70 македонски филмски режисери и продуценти и побараа повлекување на предлогот за кратење на средствата за филмска дејност, потенцирајќи дека Министерството за култура со обидот з демант и официјално ги потврдило нивните информации дека е предвидено кратење на средства од буџетот за филмска дејност на Агенцијата за филм.

-Во изминатите години сведоци сме на најразлични ветувања кои никогаш до крај не се исполнуваат. Буџетот за филм континуирано се крати  наспроти зголемувањето на содржините и буџетите во цела Европа. Несфатливо е што буџетот за филм се крати и покрај големите успеси на македонскиот филм на интернационално ниво, реагираат филмските работници.

За нив е особено важно започнатите филмски проекти непречено да се реализираат без доцнење на финанските средства.

-Проектите кои се веќе во реализација и оние чие снимање е предвидено да започне овој период не може да го чекаат евентуалното враќање на одземените средства на крајот од годината. На тој начин, колегите кои ги водат и се ангажирани на овие проекти ќе бидат во неизвесност дали и кога ќе ги добијат финансиските средства. Постојат трошоци за непречена реализација на филмовите кои мораат да бидат исплатени во текот на снимањето. Без прецизна и навремена динамика на исплата на ваквите трошоци не може да се одвива  снимањето на било кој филмски проект насекаде во светот. Дополнително потсетуваме, филмските работници живеат единствено од хонорари, никаде не се вработени и не примаат плата, стои во реакцијата која ја потпишаа 70 македонски режисери и продуценти.

Вчера македонските режисери и продуценти преку отворено писмо реагираа до Министерството за култура да го повлече предлогот за кратење на средствата од буџетот за филмска дејност за да не се нанесе поголема штета врз кревката македонска кинематографија.