Министерот за образование Јетон Шаќири денеска повтори дека државната матура ќе се полага на 27-ми мај, и покрај штрајкот на вработените во Државниот испитен центар.

-Ако треба ќе испратиме кадар од Министерството за образование, рече Шаќири додека беше во посета на Кавадарци.

Тој додаде дека ги поддржува барањата за повисоки плати на вработените во Државниот испитен центар, ама дека тоа не треба да се доведува во корелација со реализацијата на матурата и дека тие прашања треба да се решаваат системски.

Синдикатот на Државен испитен центар останува во штрајк и оттаму најавија дека во мирување ќе бидат сите процеси во нивна надлежност а кои се поврзани со матурата. Оттаму додадоа дека со тоа што вработени во Министерството за образование би влегле да „помагаат“ за спроведувањето на државната матура, ќе се наруши тајноста на процесот со оглед на тоа што материјалите, тестовите се тајни и влезот во ДИЦ е забранет за надворешни лица, а во некои простории не смеат да влегуваат ни сите вработени, а камоли надворешни лица.