Минералната вода кај тетовската излетничка месност Бањиче веќе втор месец не е исправна за пиење, покажуваат испитувањата на Центарот за јавно здравје во Тетово. Но и покрај ваквата состојба, дел од граѓание сè уште ја користат, особено во овој период од годината кога ова рекреативно место масовно се користи од граѓаните.

„Повторените анализи на минералната вода повторно покажаа дека кај чешмата кај кривината имаме микробиолошко загадување на минералната вода, а кај џамијата и микробиолошко и физичко-хемиско. Кај кривината колиформни бактерии и ешерихија коли, а кај џамијата и колиформни и ешерихија коли, ентеробактерии, зголемување на вкупен број на бактерии и зголемена концентрација на манган. Не се препорачува за пиење водата во месноста Бањиче. Обично ние вршиме испитувања четири пати во годината, меѓутоа поради тоа што многу луѓе се рекреираат во овој период од годината, направиме секој месец да ги испитуваме тие две минерални води, изјави д-р Ратко Давидовски, специјалист по хигиена и здравствена екологија при Центарот за јавно здравје Тетово.

Д-р Давидовски вели дека злаудни се апелите, но и известувањата на лице место дека минералната вода не е за пиење.

„Ние кога ќе ги ставиме резултатите, кога ќе ги залепиме, во рок од два часа се тргаат листовите. Нас ни велат: дедо ми пиел од оваа вода, ништо не е. Да, можеби дедо ти пиел ама нешто сигурно во животот му се има случено ако пиел од таа вода. Друг интересен феномен е што порано, кога ги испитувавме тие води, имавме многу ретко лош резултат, небезбеден. А сега голема реткост е да бидат безбедни резултатите. Имаме таму човечка активност, каптажите не ги знаеме кај се. Тоа се природни минерални води, па затоа не знаеме од каде се. Ама очигледно е дека има движење и човечка активност во тој басен. Некаде пет или шест има изворишта од каде што најмногу се експлоатираат овие два што ги испитуваме, истакна д-р Давидовски.

Тој потсетува дека може да дојде до нарушување на човековото здравје,

„Апелот е дека водата не е безбедна за пиење. Јас често пати кажувам дека кога почнува да се оди кон Бањиче, на првата чешма која е од 6 до 8 степени. Водата е од градски водовод, која се дезинфицира, па да се наполни едно шише и таа вода да се користи и нагоре и надолу. Минералните води не се безбедни и на двете места да се користат“, повтори Давидовски.

Месноста Бањиче која се користи за рекреација и одмор се наоѓа на околу два километри од Тетово.

Минералната вода кај месноста Бањиче забранета за пиење, има бактерии