Бугарскиот министер за надворешни работи Николај Милков денеска го повтори ставот дека во пракса немало бугарско вето за Македонија. На семинарот за млади дипломати што се одржа во Сандански тој кажа дека бугарската позиција за нашата земја е јасна и се базира на она што го одлучила Европската Унија дека кога ќе се исполнат условите како што е почитување на човековите права, правото на здружување, борбата против јазикот на омраза и злосторствата од омраза тогаш на Македонија ќе ѝ се отвори патот кон членство во Унијата.

– Прашањето за европската интеграција на Западен Балкан е процес кој е од директно значење за нас, бидејќи тоа е непосредното опкружување во кое Бугарија функционира и ја спроведува својата надворешна политика, изјавил Милков.

Според него, треба да се нагласи дека Бугарија ги штити правата на нивните сонародници во земјите во регионот и на луѓето кои имаат бугарска самосвест и се чувствуваат Бугари.

– Овие работи не се во спротивност со нашата цел за брза интеграција на Западен Балкан. Напротив, почитувањето на човековите права, почитувањето на правата на здружување, борбата против говорот на омраза и злосторствата од омраза, се критериуми за членство на овие земји во ЕУ и тоа е нешто што самата Унија го признава, додава Милков.

Минатата година Бугарија, како што им објаснувал Милков на младите дипломати, се согласи да ја даде зелено светло за Северна Македонија на патот кон ЕУ под одредени услови. Но, тоа не доведе до нормализација на односите.

Официјална Софија останува на ставот дека Скопје нема да започне вистински преговори за членство во ЕУ додека не ги исполни бугарските услови да ги почитува правата на Македонците со бугарска самосвест и да ги вклучи Бугарите во Уставот на земјата.