Бугарскиот технички министер за надворешни работи Николај Милков на денешната прес-конференција во Софија говореше за односите со Македонија и обвини дека македонските власти ги поткопале обидите за надградба на билатералните односи.

– Во однос на РСМ се кажаа многу работи. Знаете каков став зазедовме на 4 февруари. Од непостапување во врска со репресиите врз бугарските граѓани и луѓе со бугарска самосвест, властите во Република Северна Македонија пристапија кон дејствување и се виде какво е тоа дејствување. Не можеме, а да не констатираме со длабоко жалење дека станува збор за тоа дека обидите за надградба на односите со РСМ беа минирани од властите во РСМ, кои не дозволија оддавање почит на Гоце Делчев. Ние се обидовме да ги одмрзнеме односите, изјави Милков.

Тој, како што објавија бугарските медиуми, прецизираше дека имало одредени заложби, кои не биле испочитувани од Македонија.

– Првично на тројца граѓани им беше дозволено да се поклонат на гробот на Гоце Делчев, а по нашиот протест беше договорено за пет лица. Потоа се исклучи нивниот систем за влез на границата и не работеше четири часа, но не работеше само во еден правец со што се покажува целото инсценирање. На оние кои успеаја да влезат не им беше дозволено да дојдат до црквата. Никој од овие луѓе кои патуваа од Софија не успеа да се поклони во црквата. Наместо тоа луѓе беа апсени и тепани, објаснуваше Милков.

Пред новинарите во Софија тој најави дека во однос на конзуларните прашања и во однос на правната помош се планираат идни консултации, додавајќи дека од „РСМ не ја информирале Бугарија за задржаните граѓани, иако е должна според повеќе конвенции, а за настанот бугарската држава разбрала од самите граѓани кои биле задржани на граница“.