Селекторот на фудбалската репрезентација на Македонија, Благоја Милевски пред утрешниот натпревар против Гибралтар во второто коло од Лигата на нации, порача дека нема да го потценат противникот иако е аутсајдер во групата 4 од дивизијата Ц.

Милевски на денешната прес-конференција порача дека неговите фудбалери ќе мора да одиграат максимално концентрирано и одговорно.

– Не смее никого да потцениме, а и никогаш тоа не сме го направиле. Иако имаме одредени проблеми, на терен ќе излезат најспремните и нема место за експерименти и калкулации. Пристапот ќе ни биде сериозен, зашто во денешниот фудбал нема место за потценувања, ниту пак еден отсто шанса за опуштање. Гибралтар со самото тоа што е во Ц-дивизијата покажа дека напредува. Секој меч е посебен, мора посебно да се подготвите, а ние максимално сериозно ќе влеземе во мечот со мисла да победиме и момците ќе ја имаат таа мисија во сите 90 минути. Сакаме победа и ќе треба да ја оствариме. Наша обврска е да дадеме максимум без оглед со кого играме и да одиме на победа. Не смее Гибралтар да се потцени, јас со У21 загубив од Гибралтар и не ги потценивме, ама загубивме – рече Милевски.