Во одлични услови и позитивна атмосфера машката сениорска одбојкарска репрезентација на Македонија, мирно и фокусирано ги одработува подготовките за квалификациските натпревари со Грција (13 август) односно Грузија (17 август) за пласман на Европското првенство 2026.

Селекторот Јошко Миленкоски и неговиот стручен штаб засега немаат посериозни главоболки, а екипата дисциплинирано ги реализира задачите, по двапати дневно, со комбинација сала и вежбалница.

Тренинг атмосферата е доволен показател колку тимот е посветен во остварување на целта – пласманот на Европското првенство следната година, кое ќе биде четврто во низа за сениорите. Грција е главната пречка на тој пат, па токму поради тоа и сите мисли се насочени кон неа.

-Јасно е дека фокусот е на Грција, која е и наш прв противник во вториот дел од евро-квалификациите и меч, во кој треба да го дадеме нашиот максимум. Секој поен, сет, бод ќе биде плус за нас во одлуката кој ќе патува на Европското првенство. Со Грција игравме минатиот месец во Европската лига, тие ќе бидат во ист состав како на тој дуел. Добар противник, но и ривал со кој може да играме и да се носиме. Мислам дека сме доволно искусни и во комбинација со младите играчи кои носат енергија плус, и ако се мине во најдобар ред, без повреди мислам дека со добри подготовки ќе може одлично да се спротивставиме и да се надеваме на позитивен резултат. Ќе имаме квалитетни подготвителни натпревари за кревање на формата со противници по мерка, условите и во Маврово се на највисоко ниво, а не се сомневам дека така ќе биде и во Скопје. Наше е само да го дадеме најдоброто од нас и што поподготвени да влеземе во дуелите со Грција и Грузија и на крај на циклусот да се радуваме на пласман на уште едно Европско првенство – вели Милев.

Репрезентацијата до крајот на следната недела останува во Маврово, а потоа ја очекува пријателски двомеч со Бугарија во Софија, како прва проверка на формата во пресрет на евро-квалификациите.