Авганистан ризикува да влезе во граѓанска војна кога последните американски трупи ќе се повлечат од земјата, изјави командантот на мисијата „Решителна поддршка“ на НАТО во Авганистан, генералот Остин Милер.

Сите други американски трупи се очекува да се повлечат до крајниот рок што го постави претседателот Џо Бајден – на 11 септември, точно на 20-годишнината од терористичките напади на Ал Каеда врз Њујорк и Вашингтон.

Активностите на талибанците се зголемија откако САД минатиот месец почнаа да ги повлекуваат војниците, со тоа што џихадистите зазедоа многу територии.

Милер, генерал со четири ѕвездички и поранешен капетан во специјалните сили Делта форс, смета дека земјата може да се соочи со „многу тешки моменти“ доколку нејзиното раководство не се обедини по повлекувањето на меѓународните трупи.

Предупредувањето од командантот на мисијата предводена од САД во Авганистан доаѓа само неколку дена откако ОН предупредија на „ужасните сценарија“, откако талибанците зазедоа многу области.

Според ОН, од мај бунтовниците веќе зазедоа повеќе од 50 од вкупно 370 области, опкружувајќи многу градови и затворајќи го главниот град Кабул.

– Безбедносната состојба во моментов не е добра. Граѓанската војна со сигурност е патот што може да се претпостави ако работите продолжат да се одвиваат како сега. Тоа треба да предизвика загриженост за целиот свет – изјави генералот Милер на прес-конференција.

Генералот ги обвини талибанците дека не се воздржуваат од насилства, иако тоа го ветиле согласно договорот постигнат со САД.

Џихадистите наведуваат дека неодамна ја презеле контролата врз над 100 области во Авганистан, што експертите го припишуваат на недостаток на американска воздушна поддршка за авганистанските сили. Генералот Милер, меѓутоа, не ја исклучува можноста САД да продолжат да користат воздушни напади против талибанците.

– Тоа што би сакал да го видам е да нема воздушни напади, но за да се избегнат воздушните напади, мора да престане секое насилство – изјави генералот.

По нападите врз САД на 11 септември 2001 година, Америка ѝ објави војна на Ал каеда и во октомври спроведе воена инвазија врз Авганистан за соборување на талибанските власти, кои им даваа поддршка и прибежиште на терористите.

Претседателот Бајден изјави дека американското повлекување е оправдано затоа што „американските сили се увериле дека Авганистан не може уште еднаш да се претвори во база за странски џихадисти што коваат планови против Западот“.

Авганистанскиот претседател Ашраф Гани инсистира на тоа дека нивните безбедносни сили се целосно способни да ги задржат бунтовниците, но многумина стравуваат дека со повлекувањето на странските трупи од Авганистан, земјата може да падне во рацете на талибанците.