Милорад Миленковски на денешната прес-конференција нa Вардар кажа дека се водат разговори со странски инвеститор кој е подготвен да вложи 18 милиони евра во фудбалскиот клуб.

Покрај тоа, претставникот на навивачката група „Комити“ побара да се тргнат политичките игри околу клубот. Како што е веќе познато, Советот на Град Скопје изгласа помош од 15 милиони денари кои треба да „легнат“ на сметката на ФК Вардар.

– Немаме време за чекање, затоа што ние немаме никаква должност, единствено да го браниме фудбалскиот клуб Вардар. Вардар е клуб на народот, а тоа подразбира дека и институциите и сите државни механизми треба да застанат во одбрана на фудбалскиот клуб. Беше јавно пренесувана седницата на 20 јули каде што имаше две точки поврзани со фудбалскиот и ракометниот клуб Вардар. Првата точка беше ребалансот на буџетот, каде што беа предложени измени, односно помош за овие два спортски клубови во износ од 12 милиони денари. Тука настанаа амандмани, бидејќи лично бев присутен на тој совет и тоа беше алиби за неспроведување на народната волја која што советниците во Град Скопје ја донесоа акламативно без глас против.

Точката 5 беше стриктна и јасна, иницијатива за помош на спортски клубови, односно помош за ФК Вардар. Таа иницијатива беше во износ од 15 милиони денари и истата беше акламативна донесена од сите присутни советници. Тука немаше амандмани од никого, но одговорите се дека проблемот било со ребалансот на буџетот. Оваа точка не спаѓа во ребалансот на буџетот. Бараме одговор зошто таа точка не се спроведува.

Е сега, кога сме веќе кај тие 15 милиони денари, случајно таа цифра се поклопува со она што ние до сега откако го преземавме ФК Вардар го внесовме директно или индиректно како вредност, материјална во ФК Вардар. Значи, зборуваме за 15 милиони денари, па кои сме ние како „Комити Запад“ или како навивачи на Вардар да си дозволиме таква сума која што е еднаква на сума која што Градот Скопје како институција која што е задолжена да го помогне фудбалскиот клуб Вардар како негов основач. Треба да ги прашаме надлежните од Град Скопје, администрацијата и Советот зошто не е спроведено. Советот си ја донесе одлуката акламативно. Не сакаме ние одлуки само за „тапшање по рамо“.

Миленковски: Странски инвеститор е подготвен да инвестира 18 милиони евра во ФК Вардар

Ова е вторпат што е донесена одлука за помош на ФК Вардар од 15 милиони денари. А ние немаме половина милион евра на наша сметка, немаме денар добиено. Значи, тука се работи за некои други препукувања, можеби политички кои немаат поврзаност со ФК Вардар. Сакаме да им порачаме, како ќе го решат овој проблем, тргнете го ФК Вардар на страна од вашите меѓусебни препукувања за било какви проблеми и ќе видите како решението ќе биде пред вас. Не го мешајте Вардар во вашите политички каши – вели Миленковски.