Следува ракометен спектакл во Охрид, во второто коло од плеј-офот во Супер лигата, играчите на ГРК Охрид ќе го пречекаат актуелниот шампион Вардар 1961.

„Гладијаторите“ предводени од тренерот Горан Андоновски на стартот од разигрувањето за титулата и местата кои водат во Европа, триумфираа на гостувањето кај Еурофарм Пелистер 2 со 23:26.

Охриѓани најавуваат беспоштедна борба на секоја педа од теренот. Мечот ќе се игра на 18 февруари со почеток од 18.30 часот во салата „Билјанини извори“.

Цената на билетот за овој натпревар е 100 денари. Продажни места на две локации:

– Во охридската чаршија, помеѓу Т.Ц.Амам и Комплекс Летница (кај Аждер) секој ден до пред почеток на натпреварот
– Во спортската сала Билјанини Извори (на билетара) секој ден од 18.00-20.00 часот

– На гости ни доаѓа шампионот. Очекуваме спектакл и полна сала навивачи. На шампион не му се упатуваат закани, но се надеваме на одличен натпревар во кој ќе дадеме сè од себе да останеме непоразени на свој терен. Ги повикувам навивачите да дојдат во што поголем број, затоа што ќе бидат наш седми играч на теренот – вели српскиот репрезентативен голман на ГРК Охрид, Александар Миленковиќ.