Италијанскиот фудбалски клуб Милан и натаму може да го продолжи договорот со српскиот напаѓач Лука Јовиќ за уште една година, во зависност од два услови, објавија италијанските медиуми.

Јовиќ постигна два голови во победата на Милан од 3:0 над градскиот ривал Интер во реваншот од полуфиналето на Купот на Италија. Милан се пласираше во финалето, откако првиот натпревар заврши нерешено 1:1.

Јовиќ моментно постигнува гол на секои 106,5 минути игра и има најдобар однос на голови во минута во споредба со другите напаѓачи на Милан, вклучувајќи ги Сантијаго Хименез, Тами Ејбрахам и Франческо Камарда.

Договорот на Јовиќ истекува на крајот од оваа сезона, а како што објави „Калчомеркато“, раководството на миланскиот клуб сè уште има опција да го продолжи договорот за уште една година, со два услови. Првиот услов е одборот да назначи нов спортски директор кој би одобрил продолжување на соработката со Јовиќ. Најсериозен кандидат за работата е Игли Таре, поранешен функционер на Лацио.

Вториот услов е Милан да ја искористи опцијата за продолжување на договорот пред крајот на втората недела од јули, кога ќе истече клаузулата во договорот.