На по две години затвор, судот ги осуди обвинетите во случајот „Титаник 2“ на денешното повторено судење што се значително поблаги казни од претходно определените кои ги укина Апелацискиот суд. Притоа, ексдиректорот на УБК Сашо Мијалков беше прогласен за виновен за стореното кривично дело „примање награда за противзаконито влијаније врз изборниот процес“, а лидерот на ДПА Мендух Тачи и останатите обвинети кои беа членови на Државната изборна комисија за локалните избори во 2013 година, беа прогласени за виновни за кривичното дело „повреда на избирачкото право“.

Денешната одлука на судечкиот совет на чело со судијата Огнен Ставрев од Основниот кривичен суд Скопје, уследи откога Апелацискиот суд ја укина првата пресуда изречена на осми март 2019, и предметот го врати на повторно судење.

Истрагата за случајот, кој се однесува на договарање за гласање во Државната изборна комисија (ДИК) за приговор на ВМРО-ДПМНЕ за локалните избори во Струмица во 2013 година, тогашното СЈО ја отвори на 12 февруари 2016, а поднесе обвинение на 29 јуни 2017 година.

Покрај Мијалков и Тачи, обвинети беа и тогашните членови на ДИК, Бедредин Ибраими од ДПА, како и Анета Стефановска, Влатко Сајковски и Сашо Срцев од редовите на ВМРО-ДПМНЕ.

Со првата пресуда, Мијалков доби три години затвор, Тачи три години и два месеци. Највисока затворска казна од четири години и шест месеци доби Ибраими, а останатите членови на ДИК беа осудени на по три години.

Сите беа гонати за злоупотреба на службената положба и овластувања, освен Мијалков, кој е беше обвинет и за примање награда за противзаконито влијание.

За делото за кое се гони ексдиректорот на УБК настапува апсолутна застареност во април годинава. Тоа значи дека за тој да ја отслужи денеска изречената казна таа треба да биде правосилна до април, односно за неа да се изјасни и Апелација доколку странките поднесат жалби.

Обвинителот Гаврил Бубевски, минатата недела, во своите завршни зборови побара Мијалков, Тачи и поранешните членови на ДИК да бидат прогласени за виновни во случајот и секој од обвинетите да одговара според степенот на кривичното дело.

Адвокатот на Мијалков, Миле Петровски тогаш побара неговиот клиент, како и другите обвинети да бидат ослободени од обвинение. Според него, нема никаков доказ дека Мијалков го сторил делото кое му се става на товар, а тврдењето дека тој го користел своето влијание е конструкција, а не факт потврден со докази.

Вториот бранител на Мијалков, Љупчо Шврговски, изјави дека очекувал Бубевски да го повлече обвинението, бидејќи, според него, обвинителот не треба да ја преиспитува работата на судиите.

Обвинетите поранешни членови на ДИК, Бедредин Ибраими, Сашо Срцев, Влатко Сајковски и Анета Стефановска негираа вина за изборни нерегуларности до 2013 година. Сите во своите завршни зборови посочија дека работеле стручно и непристрасно, а според нив, обвинителот Бубевски не докажал надвор од разумно сомневање дека тие навистина го сториле делото.

Според обвинението, Мијалков преку лидерот на ДПА, Мендух Тачи, нарачал да му наложи на сопартиецот од ДИК, Бедредин Ибраими, да гласа за поништување на регуларно гласање во избирачко место во Струмица, во корист на Васил Пишев од ВМРО-ДПМНЕ, а на штета на тогашниот кандидат за градоначалник, Зоран Заев.